قال الخيانه من الرجال طلعة النساء رائس الفتنه هههههههههه

الحب كلمه من حرفين نجد صعوبه في التعبير عنها...فالحب متنوع ممكن أن يكون حب الاهل... حب الاصدقاء
....او حب شخص تتمنى أن يكون شريك حياتك....

الحب كلمه صغيره في كتابتها كبيره في معانيها...ويصعب على الانسان معرفة ما بعد هذا الحب الذي سوف يقع فيه...

اذا وقع الانسان بغلطة حب..يظن انه فقد حياته وان جميع ابواب الحياة اغلقت من امامه......

والحب بين شخصين من اصعب انواع الحب...فنتائجه غير معروفه...

فحب الاهل مزروع في قلب كل انسان..فحب الام والاب لابنائهم يترتب عليه نتائج كثيره ...فماذا يمكن أن يكون بعد حب الام والاب لأبنائهم!!!...

هل بعد الحب ضياع !!!
هل بعد الحب صلاح!!!
هل بعد الحب بر!!!
هل بعد الحب نكران!!!
هل بعد الحب كره!!!

اما حب الاصدقاء فهو يتوقف على مدى فهم كل منهما للآخر...والاشتراك في بعض الصفات والشخصيه....فحب الاصدقاء يترتب عليه نتائج كثيره ...فماذا يمكن أن يكون بعد حب الاصدقاء!!!.....

هل بعد الحب صداقه!!!
هل بعد الحب خيانه!!!
هل بعد الحب فراق!!!
هل بعد الحب كذب!!!
هل بعد الحب صدق!!!


اما الحب ما بين شخصين ذكر وانثى...هنا يمتلك كل منهما الآخر الخوف في توقع نتيجة الوقوع في هذا الحب..بمعنى ما بعد الحب!!!!

هل بعد الحب فراق!!!!
هل بعد الحب كره!!!
هل بعد الحب جرح!!!
هل بعد الحب حزن!!!!
هل بعد الحب خيانه!!!!
هل بعد الحب احترام!!!!
هل بعد الحب تضحيه!!!!
هل بعد الحب فرح!!!!
هل بعد الحب سعاده!!!
هل بعد الحب زواج!!!!

وهناك نتائج كثيره غيرها تترتب على هذا الحب...

اكتب قصة ما بعد الحب!!! التي تتضمن جميع نتائج الحب في هذه الحياة...حيث يتعرض كل من شخصيات القصه لنوع من انواع الحب و نتائجه .....فيتنوع من حب الاهل وحب الاصدقاء والحب الصادق والحب الكاذب....اتمنى أن تنال اعجابكم ...

و رأيي الشخصي أن حب الاهل هو الحب الدائم مهما تعرض لظروف...ومهما قست الام ومهما قسى الاب على ابنائهم يتم الحب سائد بينهم بالفطره...اما حب الاصدقاء فأرى انه من احلى انواع الحب ...فالمؤمن له اصدقاء لا يرى بركة الدنيا بدونهم ولا يشعر بهمومها مع دعائهم وكلما احبهم احبوه واذا فارقهم حنو اليه ....اما الحب الذي يكون بين الرجل والمرأه برأيي شخصي انه يكون بعد الزواج .....وسوف يدوم اكثر من الحب قبل الزواج...........





الجزء الاول










عائلة (عصام)

عصام: وايد متكبر ومغرور ، حتى على عياله ..عمره ما حسسهم بحنان الابوه
طيبه:مرت عصام. اسم على مسمى طيبه وحنونه...صابره على عصام علشان عيالها... واختها الوحيده سميره مسافره علاج..عمرها ما ضايقت احد من عيالها وكانت لهم الام والابو
حسن:ولد عصام الكبير...متزوج وعنده ولد بدر...يشتغل مع ابوه بالشركه واهو الوحيد الي يقدر يستحمل اسلوب عصام
فاطمه:مرت حسن وايد طيبه ...ويتيمة الام وطيبه تعتبرها مثل بنتها
يوسف:تخرج من كلية التجاره ..ما يحب الغلط،ويبي يشتغل مع ابوه بالشركه...دايم يذمر من اسلوب ابوه ويعتبره اهو سبب في ضياع اخوه خالد
غلا:البنت الوحيده، وايد جميله ...مخطوبه لفواز ولد خالتها وزواجهم بعد ما تتخرج ,,,واهي تدرس بفرنسا طب اسنان
خالد:الجعده ..كانت طيبه وايد الدلعه ,,,وهالشي ما كان يعجب عصام ..وحب طيبه الزايد ودلعها له اهو الي ضيعه


عائلة(ابراهيم)

ابراهيم:ريال كبير طيب .. مرته توفت واهو الي ربى عياله
سالم:اخو ابراهيم ..تزوج من وحده فرنسيه وعاشو بالامارات وياب منها عبدالرحمن وحنين بعدها تطلقت منه وهاجرت...واهو كان يحبها وبدا يسكر لما مات
هدى:بنت ابراهيم الكبيره وايد طيبه وشخصيتها ضعيفه...واي احد يقدر يتحكم فيها..مخطوبه لعماد وملجتها قريب
سلوى:اصغر من هدى بس شخصيتها اقوى ...وتدخل بكل صغيره وكبيره وتحب ولد عمها عبدالرحمن..تدرس بكلية البنات تخصص تصميم داخلي
مشاري:ولده الوحيد بين سلوى وهدى...طبعه يحب يطفر خاصة بنت عمه حنين ويحب وحده اسمها رهف تعرف عليها بالنت...يدرس بكلية الجيش آخر سنه له ويتخرج..يغار على حنين بشكل مو طبيعي ومهو قادر يحدد شعوره ناحيتها
عبدالرحمن:ولد سالم وايد طيب وحنون ...بعد ما توفى ابوه كان متخرج من ثانوي...سافر فرنسا يدرس هناك ويشوف امه وفضل أن تبقى حنين بالكويت عند عمها ابراهيم وكانت عمرها 12 سنه..وكان اهو الي مهتم بأمه بس ما كان يزورها بالبيت عشان ريلها الفرنسي
حنين:بنت دلوعه وخاصة عمها ابراهيم وايد يدلعها وهذا شي يقهر مشاري...بنفس عمر سلوى ويدرسون بنفس التخصص..ودايما تتناجر مع مشاري..وحب ابراهيم الزايد لها اهو الي مدهور العلاقه بينها اهي ومشاري

عايلة (ناديه)

نادية:بنت خالة طيبه ..عندها نواف وفواز...ريلها توفى غرقان بالبحر.. وتحملت مسؤوليتهم طبعها متقلب اهم شي عندها عيالها وتحاول تسوي أي شي حتى ما يبتعدون عنها
نواف:الولد الكبير...عمره 27 سنه تقريبا...يحب سميره وكانو بيتزوجون لو مو مرض سميره الي اكتشفته قبل العرس باسبوع...وكان مصر على زواجهم بس اهي رفضت
فواز:يشتغل بنك التمويل...عمره 24 سنه ...يحب غلا ويعتبرها كل شي بحياته ...وعلاقته مع نواف علاقة ابوه واخوه وصداقه

سميره:بنت خالة ناديه واخت طيبه...بنت جميله الكل يقول غلا تشابها بكل \شي حتى لهم نفس الشخصيه عمرها تقريبا 25 وايد قريبه من غلا...تحب نواف بس مرضها اجل العرس وسافرت بره دون لحد يدري عنها للعلاج....

شخصيات اخرى

عماد:خطيب هدى ..شوي عصبي ما يحب احد يدخل بحياته..خذا هدى عن طريق زواج تقليدي ...ابوه رفيج ابراهيم
احمد:صديق يوسف وعبدالرحمن... شخص غامض..وله ماضي محد يدري عنه...يتيم ويدرس بامريكا
ايلاف:صديقة سلوى وحنين من هم صغار وتدرس معاهم بالجامعه..اخوها محمد اصغر منها بسنه ..امها اهم شي عندها العروس والحفلات..وابوها كلا لاهي بالشركه والشغل
هند:اماراتيه رفيجة جيسيكا ام عبدالرحمن...كانت تساعد سالم في تربيت عبدالرحمن وحنين بعد ما هاجرت عنهم امهم











الجزء الاول

في بيت عصام (بو يوسف)

كالعاده لازم الكل يكون موجود على طاولة الاكل في كل وجبه
ام يوسف(طيبه):يمه فاطمه سخني الخبز
فاطمه:انشاالله خالتي

راحت فاطمه المطبخ واهي بطريج ولا حسن نازل
من الدري

حسن بابتسامه:صباح الخير
فاطمه تردله الابتسامه:صباح النور
حسن يتقرب منها:ام بدوري محلوه اليوم مادري ان الحمال يحلي
فاطمه حمر ويهها:ههههه يلا عاد مو وقته خالتي طالبه مني اسخن الخبز
حسن يسوي نفسه زعلان:يعني الخبز اهم مني
فاطمه تبتسم له:طبعا لا محد يهمني كثرك بس حبيبي انت تدري اذا نزل ابوك وما لقينا على طاوله راح يزعل
حسن بحزن:آآآه وشنو الي ضيع خالد اخوي غير اوامر ابوي الي مالها لزمه و ظلمه و تكبره وغروره، محد يدري عن خالد شي
فاطمه تقرب منه وتحاول تهديه:حبيبي حسن هذا الله كاتبه عليكم وترا عمي قلبه طيب
حسن:والله انتي الطيبه يا فاطمه، روحي سخني الخبز قبل لا يطردنا من البيت بعد

فاطمه ابتسمت له و راحت المطبخ و حسن راح الصاله واهو يتأفف من تعامل ابوه لهم الي ضيع اخوانه

نزل عصام وكانو كلهم متيمعين على الطاوله ينطرونه

عصام بغرور وكبرياء:السلام عليكم
الجميع :وعليكم السلام
عصام:عيل يوسف وينه؟؟
طيبه:طالع مع رفيجه عبدالرحمن
عصام بعصبيه:في احد يطلع هالحزه!!
حسن يهدي ابوه:يبا الله يهديك ، انت تدري ان عبدالرحمن تخرج و امس رد من فرنسا ، فراح يسلم عليه مو شايفين بعض من سنين
عصام بعصبيه:حتى لو محد يروح يسلم على الناس هالحزه
فاطمه تغير الموضوع:افا عمي ما فقدت احد
عصام يفكر:ايي والله ....وين حفيدي بدوري
حسن:ههههه ،تريق مبجر يبه وراح المدرسه
عصام:أي الله يحفظه
فاطمه:آمين
عصام:حسن خلص ريوقك بسرعه ورانا شغل
حسن يشوف فاطمه:انشاالله يبه

طيبه تساسر حسن:يمه حبيبي على راحتك اكل
حسن يبتسم لها:انشالله يمه،انتي اكلي
طيبه بحزن:الحمدالله كليت
عصام بحزم:شكليتي!!
طيبه بخوف:والله الحمد الله شبعانه
فاطمه:خالتي اكليلج شي ، كفايه امس ما تعشيتي
طيبه تتنهد:والواحد وين يذوق طعم الاكل وعياله بعاد عنه

عصام ترك الاكل الي بايده ووقف معصب

عصام بعصبيه:حسن يالله نمشي الشركه
حسن يقوم من مكانه:انشاالله يبا

وراح حسن ويا ابوه الشركه وقعدو الحريم بالبيت
لان فاطمه ماخذه اجازه علشان شهر الاول بالحمال

بالصاله
كانت فاطمه تابع برنامج طبخ اما طيبه قاعد تفكر بخالد الي ما تعرف عنه شي من سنتين واليوم عيد ميلاده

فاطمه:اقول خالتي
طيبه:قولي يمه
فاطمه:يمه ودي اسالج سؤال ؟
طيبه:سالي حبيبتي
فاطمه:مممممم انا خالتي سالت حسن بس مارد علي وخفت اساله مره ثانيه
طيبه : يمه فطومه شفيج خرعتيني؟؟
فاطمه:لا خالتي لا تخافين بس كنت بسالج وين خالد انا من ييت البيت ولا مره شفته ،بس اعرف أن عمي دازه يدرس بره
طيبه دمعت عيونها:ايييييييييه يا بنتي عمج دز خالد من اهو ياهل ما يعرف شي كان محتاج لحنانه بس اهو الله يهديه دزه امريكا يدرس في مدرسه داخليه
فاطمه تمد كلنكس حق خالتها:خالتي انا آسفه مو قصدي ابجيج
طيبه:لا ياحبيبتي انا من زمان ودي اقول حق احد على الي بقلبي
فاطمه تبتسم لها:فضفضي خالتي قولي الي بقلبج
طيبه:ايييييه يا فطومه خالد مثل ما تعرفين اهو الجعده وكان ما يلاقي حنان من عمج عصام كان دايما يستهزء فيه ودايما يفشله وفي يوم رد خالد البيت متاخر وكانت ريحته سجاير وشافه عمج وعصب عليه وطقه طق ما يطق العدو لعدوه (تبجي وفاطمه تلمها)....كان يقدر..يمسكه يعلمه أن هلشي غلط بس الي سواه غلط غلط(تنهار من البجي
فاطمه تهديها:وبعدين يا خالتي اشصار بخالد
طيبه:كان وقتها عمره 15 سنه تقريبا طلع من البيت راح عند واحد من ربعه و لما عرفو حسن ويوسف بالسالفه دوروه و اقنعوه أن يرد البيت ويتاسف من ابوه
فاطمه:ايي خالتي كملي
طيبه:بعد عمري يا خالد رد البيت وانا ما صدقت شفته يومها تهاوشت ويا عصام على هالسالفه وقالي أن اهو خلاص صار ما يستحمل تصرفاته دايما و أن يا اهو او خالد بالبيت
فاطمه تبجي:لا حول ولا قوة إلا بالله
طيبه:وبعدها دز خالد مدرسه داخليه في امريكا علشان يفتك منه مثل ما يقول ولا سأل عنه طول 4 سنين الي مرت
فاطمه:لا حول ولا قوة إلا بالله ما كنت اتوقع انه عمي عصام يسوي جذيه
طيبه:انا ما اقول إلا حسبي الله ونعم الوكيل
فاطمه:أي يا خالتي ترا كل بيت وله مشاكله
طيبه تشوف الساعه :افف صارت ساعه 11 واحنا ما طبخنا شي على الغدا
فاطمه:هههههههه خذتنا سوالف ونسينا

وراحو المطبخ يطبخون الغدا، قبل لا ايي عصام وياكلهم بلسانه


بديوانية بيت عم عبالرحمن

عبدالرحمن:حيا الله من يانا
يوسف:الله يحيك، حمدالله على سلامتك تو ما نورت الكويت
عبدالرحمن:منوره باهلها
يوسف:ها شلونك وشلون دراسه بفرنسا ؟؟
عبدالرحمن:تصدق يا يوسف اني ما حسيت بالغربه إلا أول سنه لي هناك
يوسف:هههههههههههه
عبدالرحمن:لا والله من صجي ، وايد في طلبه عرب هناك وكلنا نكون على قلب واحد
يوسف:انزين تعرفت على بنات عرب
عبدالرحمن:اعرفهم معرفة زماله مو اكثر
يوسف يغمز له :يعني بتفهمني انك ما حبيت لك وحده هناك
عبدالرحمن :ههههههههههه شدراك!!!
يوسف يتقز من مكانه ويقرب من عبدالرحمن:من صجك!!
عبدالرحمن:ههه أيي من صجي ، وانشاالله بتزوجها
يوسف:لا ..لا مو مصدق من صجك انت ليكون بس فرنسيه
عبدالرحمن:هههه اكيد لأ ...كويتيه وبنت ولا كل البنات
يوسف يغمز له :حلوه!!
عبدالرحمن:يسووووف يوز عني
يوسف:ههههههههه بنت منو؟
عبدالرحمن:مادري!!!!
يوسف:من صجك
عبدالرحمن:انا بس اعرف اسمها ، لانها اصغر مني ،باقيلها سنه وتتخرج
يوسف:يحليلك يا حمانوه في احد بيتزوج وحده ما يعرف اهي بنت منو
عبدالرحمن:انشالله بدق على سعد رفيجي اماراتي هناك اهو يعرف اني احبها ويسال لي عن اسمها
يوسف:يعني انت بتفهمني انها ما تدري انك تحبها
عبدالرحمن:لا ما قلتلها ما قدرت
يوسف مستغرب :ليش؟؟؟
عبدالرحمن:البنت وايد مأدبه ولما تقعد ويانا علشان نسوي بحث او مشروع ما يتعدى كلامنا وياها خارج الدراسه
يوسف:الله يوفقك يا عبدالرحمن تستاهل كل خير
عبدالرحمن:مشكور:إلا تعال شلون احمدو
يوسف:والله تمام بعد اسبوع يرجع من امريكا
عبدالرحمن:تخرج؟؟؟
يوسف:لا باقيله كورس بس عنده اجازه وبيي فيها الكويت
عبدالرحمن:اهو عنده اهل اهنيه.؟؟
يوسف:والله مادري ، بس الي اعرفه أن امه وابوه متوفين واهو وحيدهم
عبدالرحمن: الله يوفقه ، والله سنين ما شفنا بعض
يوسف:حكم الزمن علينا، إلا وين بتسكن الحين
عبدالرحمن :والله يا يوسف كنت ناوي استشيرك بهالموضوع
يوسف:خير ...
عبدالرحمن:مثل ما انت عارف أن بعد وفاة الوالد الله يرحمه قبل 5 سنين والوالده ابوي كان مطلقها من احنا صغار ،انا اضطريت اسافر دراسه بره وما كنت اقدر اخلي اختي الوحيده بروحها بالامارات ، وخالتي الي ربتنا واحنا صغار كبرت وما تتقدر تتحمل مسؤوليتها ، فعاشت عند عمي بالكويت والحمدالله تكيفت معاهم
يوسف:ايي يا حماني كمل...
عبدالرحمن:الحين ماني عارف شسوي ،عمي حلف علي اعيش عنده وانا مابي اكلف عليه ، وعنده بنات كبار اخاف ما ياخذون راحتهم
يوسف:والله مادري يا عبدالرحمن، بس الي اعرفه انك بتسافر الامارات بتمسك شركة عمك وابوك هناك
عبدالرحمن:ايي صح كلامك ، بس بعد سنه هالكلام ، عمي يبيني اشتغل معاه بالكويت واتعلم الشغل بعدين اسافر الامارات وامسك الشركه هناك
يوسف:وبتعيش هناك على طول؟؟
عبدالرحمن:انشاالله سنتين بالكثير علشان اقدر اصفي الشركه بدون خساره
يوسف:عيل انا انصحك انك اتم بيت عمك ، اهو ما قصر معاكم وبعدها سافرحق شغلك
عبدالرحمن بابتسامه:وانا قلت جذي بعد

وتمو يكملون سوالفهم ، وكملو ريوقهم وبعدها طلعو لي وقت الغدا ورد كل واحد بيته


بيت عصام

تيمعو كل من في البيت على الغدا حتى يوسف ، بعد الغدا صعد عصام يرتاح بداره ولحقته طيبه اما بدر راح غرفته يلعب بلاي ستيشين ويوسف راح غرفته يريح ، تمت فاطمه ويا حسن بالصاله يسولفون

فاطمه:اقول حسن
حسن يلف عليها:قولي يا عيون حسن
فاطمه منزله راسها:ممممم ترا خالتي طيبه اليوم قالتلي عن كل شي
حسن مستغرب:عن شنو!!!!!
فاطمه:عن خالد
حسن يتنهد:اييييييييييه عرفتي قصته
فاطمه تخفف عليه:ما عليه حبيبي انشاالله بيرد
حسن:وين يرد يا فاطمه محد يدري عن خالد شي
فاطمه:انشاالله يا حسن بيرد
حسن بضيق:انا يا فاطمه احاتي خالد مادري شصار له احاتي ليكون ضاع يا فاطمه
فاطمه:شقصدك؟؟؟
حسن :مادري ..ليكون رافج صحبه مو زينين و دلوه على طريج المخدرات
فاطمه:من صجك يا حسن؟؟
حسن:وليش لا...اذا من اهو ياهل دخن سجاير مو بعيد الحين محشش مخدرات
فاطمه:لا حول ولا قوة إلا بالله ،ليش ما دورتوه
حسن:ما قصرنا يا فاطمه دورناه ورفيج يوسف احمد يدرس هناك راح سال عنه قالو انحاش من المدرسه الداخليه الي كان فيها
فاطمه:وبعدين...
حسن:سالنا واحد من ربعه الي يعرفه بالمدرسه وقالنا مكان شقته
فاطمه:الحمدالله مدام لقى مكان شقته انشاالله يلقاه ويطمنك عليه
حسن:الله يسمع منج حبيبتي
فاطمه تبتسم له:انزين ما تبينا نروح نريح شوي قبل المغرب
حسن:أي والله احس اني هلكان من الشغل



بامريكا

وصل احمد شقه خالد وطق الباب محد يرد تم يطق مده لما فتح له واحد مصري وشكله كان مو صاحي

احمد:السلام عليكم
الصبي يشوفه بنظره:helloooooooo
احمد:khaled here??
الصبي سكران:مالك انته ما بتشوفني عربي جدامك ئاعد تخربط على نافوخي .... احكي معي عربي
احمد فهم انه سكران:يعني نتم واقفين نتكلم اهني!!!
الصبي:وانت مين!!!
احمد:ويلييييه انا شيابني اهني، يا حبيبي تكفى بس قولي موجود خالد
الصبي :خالد...خالد أي خالد
احمد:لا حول ولا قوة إلا بالله وبعدين يعني ،خااااااااااااااااالد عصام موجود
الصبي:ايييوه خالد ما غيره
احمد مستانس: أي خلود وينه وينه
الصبي واهو يدش داخل الشقه:مسكين خالد خلااااص راحت عليه خش السجن
احمد مخترع:شنو شتقووول..ليش؟؟
الصبي:في ايه يا خوي .... مش أول مره ده ليخش فيها السجن
احمد منصدم:نعم!!!!!!!!
الصبي:أيوه مش أول مره بيقبضون عليه وبعد كم يوم يتركونه
احمد:وباي حق؟؟
الصبي: مره بيكون سكران ومره بيكون محشش ومرات وايد ...انت بتسال ليه
احمد بعصبيه:انا رفيج اخووووه...وين القاه الحين
الصبي:ما اعرفش أي حاقه عنه تعال بعد دقيقه...او بعد كم يوم يمكن تلقاه
احمد يشوف الشقه الي كلها بطول خمر و مخدرات و الشقه عفسه :حسبي الله ونعم الوكيل على من كان السبب
وطلع احمد وخلى الصبي على حاله، واهو بطريج تم يفكر باخوه (معقوله اخو يوسف بهالمستوى)






بيت عم عبدالرحمن (ابراهيم)

ابراهيم ريال طيب توفت مرته بولادتها لسلوى،ما تزوج غيرها ما حب ييب مرة ابو لعياله تأذيهم .
حنين اخت عبدالرحمن تدرس بكلية البنات تصميم داخلي مع بنت عمها سلوى في نفس السنه ، مشاري اخو سلوى وايد محتك فيها ويسمع كلامها مع أن اهو اكبر منها ويدرس بكلية الجيش آخر سنه له ، اما هدى اخت سلوى العوده مخطوبه حق ولد خالتها عماد.

كانو كلهم قاعدين بالصاله ينطرون عبدالرحمن على الغدا، أول ما دش عبدالرحمن باس راس عمه وسلم عليهم وقعد على الطاوله

عبدالرحمن:آسف عمي أخرتكم على الغدا
ابراهيم:افا يا وليدي شالكلام، سم وانا عمك
عبدالرحمن:عيل وين هدى
ابراهيم:مثل ما تعرف عروس وتفتر من سوق لي سوق وترد تعبانه وما تبي تتغدى علشان ما تمتن
مشاري:ها حمانو وينك ما شفتك اليوم الصبح ،امس سلمت علينا ونمت على طول
عبدالرحمن:رحت اسلم على يوسف رفيجي، تذكره؟؟
مشاري يفكر:مو هذا الي رحنا معاه البر قبل سفرتك فرنسا
عبدالرحمن:ايي اهو
مشاري:يحليله خوش واحد
حنين:أي واحد عبدالرحمن الي قلتلي بقى يقلبك بالسياره مره
مشاري :وانتيييييييييييي ...شكو تسالين
حنين:والله كيفي سالت اخوي ما سألتك؟
عبدالرحمن منصدم:مشاري شفيك؟؟؟
ابراهيم:هههه لا تنصدم يا حماني هذي حالهم يوميا كلا هواش ويا بعض
حنين بدلع:اصلا حماني مشور دايما يتحرش فيني ويزعلني
مشاري بعصبيه:انا اصغر عيالج تقوليلي مشووووور!!!!

حنين تنخش ورا اخوها عبدالرحمن وسلوى وابوها ميتين ضحك عليهم

عبدالرحمن:مشاري افا ما هقيتها منك ، تعامل اختي جذي جدامي
مشاري:والله اختك هذي ام لسانين
حنين :انا ام لسانين
مشاري:ايي ويبيله قص

ركضت حنين فوق غرفتها وسكرت الباب عليها

عبدالرحمن بعصبيه:سالفتكم انتو ، شالحركات؟؟؟
سلوى بحيا:عادي عبدالرحمن احنا متعودين عليهم
عبدالرحمن يخز مشاري:مو عيب عليك تقوم البنت من غداها هذي بحسبت اختك، وبعدين اهي ما قالت شي بس اسالتني عن يوسف
مشاري:بس عيب تسال عن ربعك
عبدالرحمن:وانت شكو سالتك ولا سالتني!!!
ابراهيم:بس عاد يا عيال عيب عليكم ، احترمو وجودي
عبدالرحمن باس راس عمه:آسف عمي مو قصدي بس مشاري الله يهديه نرفزني
ابراهيم:يا وليدي لا تخاف اهم مو من صجهم ترا صارلهم سنين على هالحال تعودنا عليهم

مشاري وايد يحب عبدالرحمن ويحترمه واهو طبعه جذيه يحب يناجر وخاصة حنين يحب يطفرها بس مو قصده يضايقها

قرب مشاري من عبدالرحمن وباس راسه: وهذي بوسه وبسناك ...المهم ما تزعل علينا
عبدالرحمن بابتسامه:يا مشاري انت اخوي وانا اعرف طبعك ، بس مابي حنين تضايق
مشاري:افا عليك ...الحين اروح اتاسف منها واراضيها
عبدالرحمن:لا خليك انت كمل غداك ويا عمي وسلوى وانا اصعد لها

وصعد لها عبدالرحمن وطق باب غرفتها بس ما ردت ، فتح الباب شوي شوي لقاها نايمه على سريرها غطاها باللحاف ونزل يكمل غداه

مشاري:ها عسى رضت علينا
عبدالرحمن:لقيتها نايمه
سلوى:ايي اهي تعبانه بعد امس ، كنا سهرانين
عبدالرحمن:وشلونج مع الدراسه عسى مشيه
سلوى بخجل:ايي الحمدالله
ابراهيم:يا عيال خلو السوالف بعدين وكملو غداكم قبل لا يبرد

كملو غداهم بعدها قعدو بالصاله تم كل واحد منهم يسولف عن نفسه ،استأذن ابراهيم علشان يرتاح بغرفته و عبدالرحمن بعد راح يرتاح ، اما سلوى ومشاري تمو بالصاله يسولفون ، حنين قعدت من نوم ونزلت تحت مرت عالمطبخ تسويلها اكل

سلوى:اقول مشور
مشاري:قولي...
سلوى:عبدالرحمن بيعيش معانا بالبيت
مشاري:ايي ابوي طالب منه ، ليش تسألين؟؟
سلوى بفرح:بس جذي
مشاري:سلووووووه تدرين شمشتهي، تضحكين علي
سلوى:شنو؟؟؟
مشاري:مشتهي قهوه عربيه
سلوى:ههههههههه وانت من متى تحب هالشقلات
مشاري:مادري امس شربتها بديوانيه ودشت مزاجي
سلوى:بس راحت عليك
مشاري:ليش؟؟؟
سلوى:لان حنون متخصصه بجميع انواع القهوات خاصة المره
مشاري:مو إلا مابي من ايدها شي
سلوى:مشوور من صجك!!!!
مشاري:لا اضحك معاج ، بس مادري ليش احب اطفرها
سلوى:مسكينه الله يعينها
مشاري:انزين سلوى حبيبتي سويلي
سلوى:ما اعرف
مشاري: تدرين شلون انا بروح اسويها بنفسي
سلوى:لا بالله احترقنا

والله هدى نازله الصاله ومعاها صينية فيها اكل للرجيم

هدى:بسم الله علينا ليش نحترق؟؟
مشاري:بسم الله الرحمن الرحيم رادار انتي!!!
هدى:وي قطيعه، قول ما شاالله
مشاري:ماشاالله ، هدويه حبيبتي تسويلي قهوه عربيه
هدى:هههههه شعان عليك
مشاري:ويليييييييه وبعدين وياكم بتسوولي ولا لأ
هدى:روح المطبخ حنين هناك قاعد تطبخ
مشاري بفرح:صج الله يبش رج بالخير

راح مشاري المطبخ، وتمو سلوى وهدى يسولفون عن الملجه

مشكورررررررر اخي ناصر على المساهمة
وعلى زوئك باختيار واجهة المنتدى